Мәдениет
Сенім телефоны: 26-16-44
Бүгін: 23 мамыр 2019 жыл
KZ RU
Нашар көретіндерге арналған нұсқа
Басты бет » Қоғам

Мәдениет

Енгізілді: 18.01.2014Өзгертілді: 05.04.2019

«Қазақстан Республикасындағы тіл туралы» Заңы мен Қазақстан Республикасындағы тiлдердi дамыту мен қолданудың 2011-2020 жылдарға арналған мемлекеттiк бағдарламасының басты мақсаты мемлекеттік тілді меңгеру, дәрежесін бақылау тетіктерін енгізу жұмысын ұйымдастыру болып табылады. 

Сонымен қатар, қоғамдық өмірдің барлық саласында мемлекеттік тілге қажеттілік болуына, оның басқа тілдердің тұғырын одан әрі сақтау жағдайындағы тиісінше қолданылу сапасына және меңгерілу деңгейіне жүйелі мониторинг жүргізіліп келеді. Қала әкімдігіне қарасты мемлекеттік мекемелердің құжат айналымдарының мемлекеттік тілде жүргізілуіне ай сайын мониторинг жүргізіліп тұрады.  Мемлекеттік тілде шығысталған құжат айналымы 2019 жылдың I тоқсанында мемлекеттік шығысталған құжат айналымы 100 пайызды құрап отыр.

Есепті мерзімде қалалық мәдениет және тілдерді дамыту бөлімінің ұйымдастыруымен мемлекеттік тіл саясатын жүргізу мақсатында  10 әртүрлі іс-шаралар өткізілді. 

Оның ішінде; 1 республикалық байқау; 3  қалалық байқау; 3 дөңгелек үстел және 2 әртүрлі бағыттағы (кітап көрмесі, библиографиялық шолу) шаралар.

 

Ономастика туралы

Бөлімнің үлкен бір міндеттерінің бірі ономастикалық комиссияның жұмысын ұйымдастыру.  Бүгінгі күнге  қалада 760 көше және қалаға қарасты ауылдық округтерде 380 көше бар.

Қаланың 760 көшесінің 421 кісі есімімен, 165 көше тарихи жер-су атауларымен аталған, 174-не шартты атау берілген (Сәулет, Саяхат, Ақмаржан).

Бүгінгі таңда атау беру барысында Қазақстан Республикасы Президенті Әкімшілігінің тапсырмасына сәйкес, тарихи географиялық атауларды сақтау және қалпына келтіру, сондай-ақ халықтық және тарихи қалыптасқан атауларға құрметпен қарауын қалыптастыру үшін әкімшілік-аумақтық бірліктерді жаппай кісі есімімен атауға шектеу қойылып отыр.

Сондай-ақ, ҚР Үкіметінің жанындағы республикалық ономастика комиссиясы обьектілерге, әкімшілік-аумақтық бірліктерге, олардың құрамдас бөліктеріне атау беру және қайта атау кезінде ҚР Президенті Әкімшілігі ұсынған «Тарихи тұлғалар», «Тарихи жер-су атаулары» және «Дәстүрлі атаулар» тізімдері бекітілген. Осы заңдылықтарды ескере отырып, республикалық ономастика комиссиясы бекітіп жолдаған Тарихи тұлғалардың ғана есімі қаралуда.

 

 

Маңдайша жазулары және жарнамаларды ретке келтіру жайында

2011 жылы Қазақстан Республикасының «Жарнама туралы» Заңына өзгерістер енгізіліп, осы Заңның 17-2 бабында көзделген құзыреттерді орындау қала әкімінің 2012 жылғы 23 қаңтардағы №2983 қаулысымен қалалық сәулет және қала құрылысы бөліміне жүктелді. Жарнамалық нысандарға келісім алуға жататын уәкілетті органдардың бірі ретінде белгіленген «Қалалық мәдениет және тілдерді дамыту бөлімі» мемлекеттік мекемесі рұқсат беру құжаттарын рәсімдеу кезінде жарнама мәтінінің ҚР «Қазақстан Республикасындағы тіл туралы» Заңының талаптарына сәйкестігі жайында келісім беріп келеді.

Сонымен қатар, 2019 жылдың наурыз айында қала әкімдігі тарапынан Қазақстан Республикасының «Қазақстан Республикасындағы тіл туралы», «Жарнама туралы» Заңдарының талаптарына сәйкес, қала көлеміндегі көрнекі ақпараттың жай-күйіне рейд жұмыстарының жүргізу кестесі бекітілді.

Осыған орай, Қызылорда қаласында заңсыз ілінген жарнамаларға қалалық мәдениет және тілдерді дамыту, ішкі саясат бөлімдері бірлесіп рейд жұмыстарын жүргізді.

Рейд барысында ҚР «Жарнама туралы» заңында көрсетілгендей жарнамалардың идеологиялық тұрғыдан сәйкес келмейтін, тозығы жеткен, қала көркінің келбетіне сай келмейтін көрнекі ақпараттарды ауыстыру насихатталып, 313 нысанға түсіндірме жұмыстары жүргізілді.

Соның ішінде, ҚР «Тіл туралы» Заңының 21-бабына сәйкес келмейтін    22 нысан анықталды.

Осының негізінде, кәсіп иелеріне көрнекі ақпараттардың мәтіндерін жазу және орналастырудың схема-үлгісі таратылды.

Тарихи-мәдени ескерткіштер бойынша 

 

Бүгінгі күнге қала көлемінде 78 тарихи - мәдени ескерткіштер бар, оның ішінде республикалық маңызды - 4, жергілікті маңызда - 31 ескерткіш, алдын-ала есепке алу тізіміне ұсынылғандар саны – 43.

Оның ішінде тарихи ғимараттар саны – 19, ескерткіштер – 35, және 24 бюсттер бар.

Қала көлеміндегі ескерткіштерді сақтау және пайдалану бағытында бірқатар шаралар жүргізіліп келеді, барлық ескерткіштерге қорғау тақталары орнатылып, төлқұжаттары әзірленді.

Бүгінгі таңда Қызылорда қаласы аумағында орналасқан тарихи және мәдени ескерткіштерді теңгерімге алу мақсатында қалалық қаржы бөлімінің 2017 жылғы 2 маусымдағы бұйрығына сәйкес, Қазақстан Республикасының «Мемлекеттік мүлік туралы» Заңының аясында тиісті пайдаланушы мекемелердің теңгеріміне берілді.     

 

Мәдени көпшілік-шаралар бойынша

«Терроризммен ұжым болып күресейік» кәсіпорын қызметкерлері арасындағы кездесу кешінің мәліметі

2019 жылдың 25 қаңтарында «Терроризммен ұжым болып күресейік» атты кәсіпорын  қызметкерлері және тиісті сала мамандарының қатысуымен экстремизм және терроризмге қарсы  ішкі қимылдар сабағы болып өтті.

Арнайы ұйымдастырылған сабаққа облыстық төтенше жағдайлар жөніндегі басқармасының инженері  Салмырзаұлы  Зұлқарнай келіп,  кәсіпорын  қызметкерлеріне  төтенше   жағдай  кезінде қандай  іс-қимылдар  жасалу  керек,  не нәрсені  басты  назарға   алу  қажеттігі  жайында   қысқаша баяндама жасады. Баяндамашыға кәсіпорын қызметкерлері тарапынан қажетті сұрақтар қойылып, сәйкесінше жауап берілді.

Әрі қарай кәсіпорын директорының шаруашылық жөніндегі орынбасары Азамат Әуезханұлы арнайы терроризм тақырыбында бейнеролик көрсетіп, терроризмнің таралу қаупі, еліміздің қауіпсіздігіне төнетін шынайы қауіпке айналып отырғанын түсіндіріп өтті. Сондай–ақ, кәсіпорын қызметкерлеріне күдікті зат тауып алған жағдайдағы арнайы жаднамамен таныстырды.

 

Мемлекет басшысы Н. Назарбаевтың «Ұлы даланың жеті қыры» атты мақаласын іске асыруға арналған қалалық актив жиынының мәліметі

2019   жылдың    27 қаңтарында    А. Тоқмағамбетов   атындағы   мәдениет  Үйінде   Елбасы

Н. Назарбаевтың «Ұлы даланың жеті қыры» атты мақаласын іске асыруға арналған қалалық актив жиыны өтті.

«Бірлік» мәдени-үгіт бригадасы өнерпаздарының өнер көрсетуімен шымылдығы түрілген актив жиынын айтыскер ақын М. Ниязов жүргізіп отырды.

Алғашқы сөз кезегін алған қала әкімінің орынбасары Ш. Байманов мақаланың мәніне қысқаша тоқталып, бүлдіршіндер тәрбиесіне қатысты мәселелер тұрғысындағы өз ұсынысын жеткізсе, «Нұр Отан» партиясының Қызылорда облыстық филиалының орынбасары Е.Байтілес өз кезегінде тарихымызды түгендейтін кинолар көбірек түсірілсе деген пікірін білдірді.

Айта кету керек, актив жиыны еркін форматта өткізілді. Оған дәлел әрбір баяндамашыдан соң баяндама мәнін ашатын концерттік нөмірлер жіберіліп отырды. Сыр өңіріне белгілі ҚР Мәдениет қайраткері Р.Ахметовтың шәкірттерінен құралған жыраулар блогы, «Томирис» би ансамблі, «Сырлы саз» халықтық фольклорлық ансамблінің жетекшісі Н. Ахметов өнер көрсетті.

Сондай-ақ, Қазақстанның еңбек сіңірген қайраткері, филология ғылымдарының докторы, «Қорқыттану   және  өлкетану тарихы»    ғылыми-зерттеу  институтының   директоры,    профессор

 Б. Кәрібозов «Сыр өңірінің фольклорлық антологиясын жасау» тақырыбында баяндама жасаса, тақырыпқа тұздық ретінде жас қобызшы Т. Ағыраев Қорқыттың «Қоңыр» күйін нақышына келтіріп орындады. 

Сонымен қатар, Т. Жүргенов атындағы қоғамдық қор төрағасы, еңбек ардагері С.Аңсатов түрлі жазушылар шығармасынан мысал келтіре отырып «Қазақы дүниетанымның ұрпақ тәрбиесіндегі» рөлін айқындаса, облыстық «Сыр дидары» газетінің бас редакторы С.Алдашбаев «Қазақы салт-дәстүрдің мағынасына» үңілді. Ал Phd доктор, археолог Ә.Тәжекеев «Сыр өңірінің ұлттық тарихтағы орнын» айқындау керек мәселелердің көптігін алға тартты. 

Елбасы Н. Назарбаев аталмыш мақаласында «Төл тарихын білетін, бағалайтын және мақтан ететін халықтың болашағы зор болады деп сенемін. Өткенін мақтан тұтып, бүгінін нақты бағалай білу және болашаққа оң көзқарас таныту – еліміздің табысты болуының кепілі дегеніміз осы» деген болатын. Олай болса, алда атқарылар міндеттер жеткілікті.

 

«Әндер мен жылдар» атты жастар мен ардагер өнерпаздар концертінің мәліметі

2019 жылдың 31 қаңтарында А.Тоқмағамбетов атындағы қалалық мәдениет үйінде қалалық мәдениет және тілдерді дамыту бөлімінің ұйымдастыруымен «Әндер мен жылдар» атты жастар мен ардагер өнерпаздардың концерті өткізілді.

Шараны ашып берген қалалық мәдениет және тілдерді дамыту бөлімінің басшысы А.Есмаханов өнерпаз ардагерлерге жылы лебізін білдіріп, тағылымды шараның ұрпақтар сабақтастығының дәлелі екенін айтты.

«Қартайдық, қайғы ойладық» демей, жастармен бірге сахнаға шығып, ән салып, көңіл серпілткен «Жан шуақты әжелер», «Бастаңғы», «Асыл жандар», «Аталар ансамблі» сондай-ақ, ақын Қ. Өзденбаева, жеке орындаушылар О. Әйтімова бастаған аға-апаларымыз, өнерпаз ардагерлер қашанда жастарға үлгі.

 

М.Мақатаевтың туған күніне орай және ақын шығармашылығына арналған «ӘР ӨЛЕҢІ – БІР ӘЛЕМ» атты әдеби-сазды кешінің мәліметі

2019 жылдың 7 ақпан күні А. Тоқмағамбетов атындағы  Мәдениет үйінде қалалық мәдениет және тілдерді дамыту бөлімінің ұйымдастыруымен ақиық ақын М. Мақатаевтың туған күніне арналған «Әр өлеңі – бір әлем» атты әдеби сазды кеш болып өтті. Мұқағали ақынның туған күніне орай ұйымдастырылып отырған бұл концертте «Мереке» вокалды-аспапты ансамблі жанды дауыста өнер көрсетті. Әдеби-сазды кеште  жастар театры әртістері поэмаларын оқып, ал көрермендер арасынан еріктілер шығып ақынның өлеңдерін  жатқа айтып бір көңіл серпілтті.

 

Соқырлар қоғамы клубы

2019 жылдың  ақпан  айының  8-ші  жұлдызы күні  Зағиптар  қоғамы  клубы  мен  Қазақ  соқырлар  қоғамына қарасты, көз  мүгедектеріне  арналған арнаулы  кітапхана ұжымының бірлесіп  ұйымдастыруымен «Поэзия,  менімен  егіз бе едің?» атты  әдеби-әуезді  кеш болып  өтті. Кешті  кітапхана  қызметкері  Бекенова Айна сөз сөйлеп ашып берді. Шараға Смағұл Ысқақов атындағы Қызылорда құрылыс және бизнес колледжінің студенттері қатысып, ақынның  шығармашылығынан  өлеңдерін  оқыды. Зағиптар қоғамы  клубының  өнерпаздары  Нурлиева  Ақмарал  ақынның  өлеңдерін  оқып «Саржайлау» әнін  орындаса, Төлегенова Зәбира домбырамен «Сәби болғым келеді» әнін нақышына келтіріп орындады. Кешті кітапхана қызметкері Өтеуов Еркебұлан жүргізді. Кеш соңы клуб әдіскері Айбек Шүкіровтың  орындауындағы «Үш бақытым» әнімен  аяқталды.

 

Қызылордада көші-қон орталығы ашылды

2019 жылдың 8 ақпан күні Қызылордада көші-қон орталығы ашылды. Бұл орталықта шетелге іссапарға шығатын немесе өңірге келген шетелдіктерге қызмет көрсететін болады.

Орталықтың ашылу салтанатына Қызылорда облысының әкімі Қ. Көшербаев пен "Азаматтарға арналған үкімет" мемлекеттік корпорациясы" коммерциялық емес акционерлік қоғамының Басқарма төрағасы Абылайхан Оспанов қатысты.

Аймақ басшысы тұрғындарды көші-қон орталығының ашылуымен құттықтап, мемлекеттік қызмет саласын цифрландыру бойынша облыста жүргізіліп жатқан жұмыстарды атап өтті.

«Елбасы өз Жолдауында 2019 жылы мемлекеттік қызметтердің 80 пайызы электронды форматқа көшуі тиістігін тапсырды. Бүгінгі күні Қазақстанда әлемдік тренд көшінен қалмай, «Цифрлы Қазақстан» кешенді бағдарламасын қарқынды жүзеге асыруда. 2018 жылдың соңында «Азаматтарға арналған үкіметтің» облыстық филиалы жанынан Цифрлық қызмет көрсету секторы ашылып, халық игілігіне ұсынылды. Міне, енді Көші-қон орталығын ашып отырмыз. Айта кетейін, 2018 жылы өңірде 36 577 шетел азаматы тіркеліп, 15 614 шетелдіктің еңбегі заңдастырылды. Демек, жаңа орталықтың қызметіне деген сұраныс артады деген сөз. Енді шетелге жұмыс сапарымен шыққан және елімізге жұмыс бабымен келген азаматтар құжат толтыру үшін қаланы шарламай, бар құжатын бір «терезе» жүйесінде рәсімдей алады. Бұл өңіріміздің инвестициялық имиджіне де оң әсер етеріне сенемін»,-деді аймақ басшысы.

Осыдан 10 жыл бұрын орта есеппен күніне 50 шақты адамға мемлекеттік қызметтің 70 түрі көрсетілсе, бүгінгі күні мемлекеттік Реестрдегі 750-ден аса қызметтің 621-ін «Азаматтарға арналған үкімет» көрсетіп, қалғанын Электронды үкімет порталы арқылы алуға мүмкіндік бар. Қазір мемлекеттік корпорация облыс бойынша бір күнде 5-6 мың адамға дейін қызмет көрсетеді.

 

«Жастықтың оты жалындап» атты 2019 жыл - жастар жылына арналған республикалық айтыстың мәліметі 

Осы тақырыпта 2019 жыл - жастар жылына арналған республикалық айтыс өтті. «Бұлақ көрсең көзін аш» демекші, Қызылорда қаласы әкімдігінің қолдауымен, қалалық мәдениет және тілдерді дамыту бөлімінің ұйымдастыруымен, қазақтың атадан балаға мирас төл өнерін насихаттау мақсатында өткен бұл айтысқа еліміздің түкпір-түкпірінен және Сыр өңірінен 10 жас ақын қатысып, ой жарыстырды.

Қала әкімінің орынбасары Шахмардан Байманов пен ақын Жүрсін Ерман айтысты ашып беріп, талапкер ақындарға сәттілік тіледі. Жас ақындар додасын екі дүркін «Алтын домбыра» иегері Мұхтар Ниязов жүргізді. Ат сүрінгенше ақыл таба білу айтыс ақынына жүктелген міндет дейтін болсақ, байрақты додаларда алдыңғы лектен көрініп жүрген жас ақындарымыздың тапқырлығы мен оғаш кеткен тұстарын зерделеп, лайықты бағасын беруші қазылар алқасының құрамында «Айтыстың жүрегі» деген атты халық берген Жүрсін Ерман, Сыр елінің тумасы, Қызылорда облысының "Құрметті азаматы", «Айқын» газетінің бас редакторы, қаламы қарымды журналист Нұртөре Жүсіп, Алаштың арқалы ақыны Бауыржан Халиолла, ҚР мәдениет қайраткері, Сырдың сырбаз ақыны Оңталап Нұрмаханов және Сыр елінің аяулы ақын қыздарының бірі Айнагүл Әбуовалар болып, әліне қарай шапқан алуан жүйрікке төрелік жасады.

Ақ Орданың қашанда құты кенді,

Бақытым деп таныған бүтін елді.

Қорқыт қолдап, ақ жол болсын, Жас ақыным!

Домбыраң Сыр елінде үкіленді – демекші, айтыс қорытындысы бойынша жүлделі III орынды Астанадан келген Нартай Тілеуқұл еншілесе, II орын Алматыдан келген Нұрбол Жауынбаевқа, I орын Сырдың сарғалдақ ақын қызы Нұрзат Қаруға бұйырса, Бас жүлде-кешегі Тайжандардың мақамын салып, халықтың қошеметіне бөленген, Елордалық Дәурен Ысқақтың қанжығасында кетті.

Қашаннан жырдың елі атанған Сыр жұртшылығы жас ақындар ғой демей, мәреге келетін жүйріктерге соңына дейін көтермеші болып, ыстық ықыласпен қолдап отырғанына еліміздің басқа аймақтарынан келген жас ақындар өз ризашылықтарын білдірді.

 

«Бұрымды ару – 2019» облыстық телевизиялық байқауы

Қолаң шаш үлгісін бүгінге дейін жалғап келе жатқан қазақтың ибалы, инабатты қыздарын жастарға үлгі етіп көрсету мақсатында Жастар жылына орайластырылған байқау әдеттегідей Қызылорда қаласы әкімдігінің қолдауымен, сондай-ақ қалалық мәдениет және тілдерді дамыту бөлімі мен облыстық «Қызылорда» телеарнасының ұйымдастыруымен өткізілді. Бас демеуші - «Петро Қазақстан Құмкөл Ресорсиз» акционерлік қоғамы.

Биыл үшінші мәрте жалауын желбіретіп, аймағымыз бойынша 10 талапкер қатысқан байқауға Ақын, журналист, Қазақстан Жазушылар Одағы Қызылорда облыстық филиалының төрағасы Қаршыға Есімсейітова, ақын, режисер-сценарист Оңталап Нұрмаханов, облыстық аналар және әйелдер кеңесінің төрайымы Нұрсәуле Мұсаева, «Қалалық мәдениет Үйі, клубтар және халықтық ұжымдар» мемлекеттік коммуналдық қазыналық кәсіпорны директоры Эльмира Қанатбаева, ақын, қазақ зергерлік өнерін насихаттаушы Асылзат Арыстанбек сынды белгілі тұлғалар қазылық жасады.

Қалалық мәдениет және тілдерді дамыту бөлімінің басшысы Есмаханов Алмасбек Әбілқасымұлы байқауды ашып беріп, талапкерлерге сәттілік тіледі. Сондай-ақ, байқау барысында шараның жоғары деңгейде өтуіне атсалысқан бірқатар демеушілерге шаһар басшысы Н.Нәлібаевтың алғыс хаттары тапсырылды.

Байқау нәтижесінде 6 талапкер арнайы номминациялармен марапатталса, Шиелі ауданынан қатысқан Ғани Ұлту жүлделі 3 орынды, Ақмешіт институтының 3 курс студенті Серік Аружан 2 орынды қанағат тұтса, 1 орын Қорқыт ата атындағы ҚМУ студенті Таубай Аружанға бұйырды. Ал, байқаудың бас жүлдесі М.Мәметова атындағы Қызылорда педагогикалық жоғарғы колледжінің студенті Орман Ақмаржанның қоржынында кетті.

Жеңімпаздар мен барлық жүлдегерлерге, барша қатысушыларға бағалы сыйлықтар тапсырылып, сонымен қатар, байқаудың жекелеген демеушілері тарапынан да өздері ұнатқан бұрымды аруларға сыйлықтар берілді.

 

Жастар

№12 кітапхана «Коворкинг» орталығында  «Жас отан»  жастар қанатымен бірлескен  «Кітап-кәусар бұлақ» атты  жастарды кітап оқуға тарту мақсатындағы   жаңа жоба ашылып,   алғашқы іс-шараны жастар оқыған кітаптары жайлы пікір алмасудан бастады.  Өздері оқыған кітаптары,   жағымды, жағымсыз  кейіпкерлер  жайлы айтып,  тарихи кітаптармен  қатар көркем  әдебиетке деген  қызығушылықтарын білдірді.  Психологиялық,  өмір сүру әдістерін,  табыс табу жолдарын үйрететін  заманауи тақырыптағы   кітаптар жайлы   оң пікірлерін білдірді.

№ 17 кітапханада  «Жастар-мәңгілік ел болашағы» атты әдеби қонақжай өткізіліп, шараға ауыл жастары, белсенді оқырмандар қатысты.  Қызылжарма жастар бірлестігінің мүшесі  Жаңалық Талғат айтулы жыл қазақстандық жастарға мол мүмкіндік сыйлап, ел келешегі үшін зор міндеттер жүктейтіндігін  айтып, пікірін ортаға салды.. Ауыл жастары жастар саясаты, білім алудағы зор мүмкіндіктер,   өркениетті қоғамдағы жастар белсенділігімен бәсекеге қабілеттілік   төңірегінде,  өз ойларын ортаға салды.

 

Ұлыстың ұлы күні Наурыз мерекесіне арналған «Наурыз – береке бастауы» атты мәдени шараның мәліметі

Тарихи тамыры тереңге бойлаған әз-Наурыз дана халқымызда қай кезде де еңсесі биік елдіктің, іргесі сөгілмес бірліктің, ырыс пен ынтымақтың мерекесі болып келе жатқан Ұлыстың ұлы тойы - Наурыз Сыр елінің бас қаласында жоғары деңгейде аталып өтті.

«Наурыз-ұлы дала мерекесі» атты прологпен басталған мәдени шарада Елбасы   Н.Назарбаевтың «Ұлы даланың жеті қыры» мақаласында көрсетілгендей Қазақстан алма мен қызғалдақтың отаны екенін дәлелдейтін «Алма. Қызғалдақ» композициясы, сондай-ақ атқа міну мәдениетін күллі европаға үйреткен түркі жұрты екенін әспеттейтін асауларды бағындыру, қолға үйрету, құрық салу т.б. пластикалық би ырғақтары көрініс тапқан «Асауға тұсау» биіне ұласты.

Сонымен қатар, екі жақтан көрік басу мизансценасы көрініс тауып, Аң стилі формасында жасалған ежелгі таңбалық құймаларды ұстаған ұлттық киімдегі жігіттер балетмейстердің пластикалық шешімімен бейнеленді. Әрі қарай «Жібек жолымен» ұлы көш келіп, ұлттық киім киген қыз-жігіттер мереке ажарын келтірді.

Барша жиналған қауымға «Наурыз баба» бата беріп, Жастар жылына арнап шығарылған жас ақын Ұ.Тәңірбергеновтың   сөзіне    жазылған     сазгер   Ж. Оразғұловтың    «Самға»    әнін Ж. Оразғұлов пен А. Наукеева орындап, жоғары және арнаулы орта оқу орындары студенттері флешмобпен көркемдеді.

Қала тұрғындарын және шараға келген қала қонақтарын аймақ басшысы Қ. Көшербаев құттықтап, ел мерейінің арта беруін тілейтінін жеткізді. М.Мәметова атындағы жоғары колледжінің «Япурай» хор ұжымы Мұхан Төлебаевтың «Біржан – Сара» операсынан үзінді орындап, филармония әншілері «Жарапазан» әнін айтып, мерекелік шараның соңы концерттік бағдарламаға ұласты.

 

«Өмірдің өзі-театр» атты мерекелік кештің мәліметі

27 наурыз Халықаралық театр күніне орай Қызылорда қалалық мәдениет және тілдерді дамыту бөліміне қарасты «Жастар» театрының ұйымдастыруымен "Өмірдің өзі-театр" атты мерекелік кеш өткізілді.

Кештің басы «Жастар» театрының репертуарындағы спектакльдердің үзінділерімен бастау алып, ары қарай концерттік бағдарламаға ұласты.

Сонымен қатар, аталған мерекелік шарада театр әртістері бірқатар мараппаттарға ие болды.  Атап айтар болсақ,  «Нұр Отан» партиясы  Қызылорда облыстық  филиалының,  қала  әкімі Н. Машбекұлының, Қазақстандық салалық мәдениет, спорт, туризм және ақпарат қызметкерлерінің кәсіптік одағының және де қалалық мәдениет және тілдерді дамыту бөлімінің алғыс xаттары, театр қызметкерлеріне табысталды. Сонымен қатар, саxнагерлерге «Үздік суретші», «Үздік ер адам бейнесі», «Үздік әйел адам бейнесі», «Үздік эпизодтық роль» атты номинациялар табысталды.

 

«Ізет. Иба. Парасат» қалалық енелер мен келіндер байқауының мәліметі

«Ізет. Иба. Парасат.» Осы тақырыпта қалалық енелер мен келіндер байқауы өтті.

Сыр елі қашаннан қазақылықтың қаймағы бұзылмаған, салтын сақтаған, дәстүрін ұлықтаған, телісі мен тентегін тиым сөзімен-ақ құрықтаған, ата жолын ұмытпаған қасиетті мекен. Сондықтан да әрдайым ізгілікке, әдептілік пен инабаттылыққа, имандылыққа шақыратын үлкен істердің баршасының бастамашысы болып келеміз.

Осы ретте, «Нұр Отан» партиясы Қызылорда қалалық филиалының қолдауымен, қалалық мәдениет және тілдерді дамыту бөлімінің ұйымдастыруымен өткен «Ізет, иба - парасат» атты қалалық ене мен келіндер байқауында «енесі мен келінінен құралған 11 жұп бақ сынасып, байқау талабына сай өнер көрсетті.

Байқауды ашып берген қалалық ардагерлер кеңесі төрағасының орынбасары Жақай Бодықбаев қатысушыларға сәттілік тілеп, бұндай байқаулардың қаймана жұртқа үлгі болатынын, тәрбиелік мәні зор екенін айтты.

Қатысушылар 4 кезең бойынша сынға түсіп, өздерінің жан-жақты дайындықтарын көрсетті. Айта кетейік, байқауға облыстық аналар және әйелдер кеңесінің төрайымы Н. Мұсаева, «Ақмешіт» халықтық фольклорлық ансамблінің жетекшісі Н. Ахметов және ардагер Т. Дәриева қазылық жасады.

Байқау қорытындысы бойынша жүлделі үшінші орын А. Байділдаева мен Қ. Жанғабыловаға бұйырса, екінші орынды Б. Ермағамбетова мен келіні Қ. Абдуллаева иеленді. Ал, бірінші орынды   А. Пазылова мен А. Арыстанбекова  еншілесе,   байқаудың  бас   жүлдесі  К. Әмзеева   мен Г. Құрымбаеваның қанжығасында кетті.

Фотогалерея
Сауалнама
Қандай экологиялық мәселе сізді басқалардан гөрі қатты толғандырады?

 ауаның ластануы
 су қоймаларының ластануы
 ағаштардың кесілуі
 басқасы

 
Халықтық бақылау
Видеогалерея